Shoq Har Rang Raqeeb-E-Sar-O-Samaan Nikla

Shoq Har Rang Raqeeb-E-Sar-O-Samaan Nikla,

Qais Tasweer Ke Parde Main Bhi Uriyaan Nikla,

Zakhm Ne Daad Na Di Tangi-E-Dil Ki Ya Rab,

Teer Bhi Seena-E-Bismil Se Par Afshaan Nikla,

Bu-E-Gul Naala-E-Dil Dud-E-Charaag-E-Mehfil,

Jo Teri Bazm Se Nikla So Parishaan Nikla,

Dil-E-Hasrat Zada Tha Maaida-E-Lazzat-E-Dard,

Kaam Yaaron Ka Ba-Qadar-E-Lab-O-Dandaan Nikla,

Thi Nauaamoz-E-Fana Himmat-E-Dushwaar Pasand,

Sakht Mushkil Hai Ki Ye Kaam Bhi Aasaan Nikla,

Dil Main Phir Giriya Ne Ik Shor Uthaya 'Ghalib'

Aah Jo Qatra Na Nikla Tha So Tufaan Nikla ...