Ay Ishq Kaheen Le Chal, Is Paap Ki Basti Se

Ay Ishq Kaheen Le Chal, Is Paap Ki Basti Se

Nafrat Gah-E- Aalam Se, Laanat Gah-E-Hasti Se

In Nafs Paraston Se, Is Nafs Parasti Se

Door Aur Kaheen Le Chal

Ay Ishq Kaheen Le Chal

Hum Prem Pujaari Hain Tu Prem Kanhayya Hai

Tu Prem Kanhayya Hai Ye Prem Ki Nayya Hai

Ye Prem Ki Nayya Hai, Tu Is Ka Khiwayya Hai

Kuch Fikr Nahi Le Chal

Ay Ishq Keheen Le Chal

Be-Rehm Zamaane Ko Ab Chor Rahe Hain Hum

Be-Dard Azizon Se Moonh Mor Rahe Hain Hum

Jo Aas Ki Thi Woh Bhi Ab Tor Rahe Hain Hum

Bas Taab Nahi Le Chal

Ay Ishq Kaheen Le Chal ...

Ye Jabr-Kadah, Aazad Afkaar Ka Dushman Hai

Armaanon Ka Qaatil Hai Umeedon Ka Rahzan Hai

Jazbaat Ka Maqtal Hai, Jazbaat Ka Mad-Fun Hai

Chal Yaan Se Kaheen Le Chal

Ay Ishq Kaheen Le Chal ...

Aapas Main Chaal Aur Dhoke Sansaar Ki Reetain Hain

Is Paap Ki Nagri Main Ujri Si Pretain Hain

Haan Niyaaya Ki Haarain Hain, An-Niyaaya Ki Jeetain Hain

Sukh Chain Nahi, Le Chal

Ay Ishq Kaheen Le Chal ...

Ye Dard Bhari Duniya Basti Hai Gunahon Ki

Dil Chaak Umeedon Ki, Saffaak Nigahon Ki

Zulmon Ki, Jafaon Ki, Aahon Ki, Karahon Ki

Hain Ghum Se Hazeen Le Chal

Ay Ishq Kaheen Le Chal ...

Aankhon Main Samaai Hai, Ik Khwaab-Numa Duniya

Taaron Ki Tarah Raushan, Mehtaab-Numa Duniya

Jannat Ki Tarah Rangeen, Shadaab-Numa Duniya

Lillah Waheen Le Chal

Ay Ishq Kaheen Le Chal ...

Ay Ishq Humain Le Chal Ik Noor Ki Waadi Mein

Ik Khwaab Ki Duniya Main, Ik Toor Ki Waadi Mein

Khoron Ke Khayalaat-E- Masroor Ki Waadi Mein

Ta-Khuld-E- Bareen Le Chal

Ay Ishq Kaheen Le Chal ...

Maghrib Ki Hawaon Se Aawaz Si Aati Hai

Aur Hum Ko Samandar Ke Us Paar Bulaati Hai

Shayad Koi Tanhaai Ka Daiss Bataati Hai

Chal Us Ke Qareen Le Chal

Ay Ishq Kaheen Le Chal ...

Ik Aisi Fiza Jis Tak Ghum Ki Na Rasaai Ho

Duniya Ki Hawa Jis Main Sadiyon Se Na Aai Ho

Ay Ishq Jahan Tu Ho Aur Teri Khudaai Ho

Ay Ishq Waheen Le Chal

Ay Ishq Kaheen Le Chal ...

Ik Aisi Jagah Jis Main Insaan Na Baste Hon

Ye Makr-O Jafa Pesha Haiwaan Na Baste Hon

Insaan Ki Qaba Main Yeh Shaitaan, Na Baste Hon

To Khouf Nahi Le Chal

Ay Ishq Kaheen Le Chal ...

In Chaand Sitaron Ke Bikhre Huwe Shehron Main

In Noor Ki Kirnon Main Tehri Hoi Lehron Main

Thehri Hui Lehron Main, Soi Hui Nehron Main

Ay Hizr-E- Haseen Le Chal

Ay Ishq Kaheen Le Chal ...

Ik Aisi Bahisht Aain Waadi Mein Pohanch Jayein

Jis Mein Kabhi Duniya Ke Ghum Dil Ko Na Tarpayein

Aur Jis Ki Baharon Main Jeene Ke Maze Aayein

Le Chal, Tu Waheen Le Chal

Ay Ishq Kaheen Le Chal -----